காவிரியில் கர்நாடக அரசு தண்ணீர் திறந்துவிட மறுத்துவிட்டதால் டெல்டா மாவட்டங்களில் பயிரிடப்பட்ட சம்பா நெற்பயிர்கள் கருகியது. கடன் வாங்கி பயிரிடப்பட்ட நெற்பயிர்கள் கருகியதால் டெல்டா மாவட்டத்தை சேர்ந்த 7 விவசாயிகள் தற்கொலை செய்து கொண்டனர்.
இந்த நிலையில் தற்கொலை செய்து கொண்ட விவசாயிகளின் குடும்பங்களுக்கு நஷ்டஈடு வழங்க கோரி சென்னை உயர் நீதிமன்றத்தில் வழக்கறிஞர் யானை என்பவர் வழக்கு தொடர்ந்துள்ளார்.
தற்கொலை செய்து கொண்ட விவசாயிகள் குடும்பத்துக்கு தலா 20 லட்ச ரூபாய் வழங்க வேண்டும் என்றும் நீரின்றி கருகிய நெற்பயிருக்கு ஏக்கருக்கு 25 ஆயிரம் ரூபாய் வழங்க வேண்டும் என்றும் மனுவில் கூறியுள்ளார்.
மேலும், தற்கொலை செய்து கொண்ட விவசாயிகளின் குடும்பத்தில் ஒருவருக்கு அரசு வேலை வழங்க வேண்டும் என்றும் மனுவில் கோரிக்கை வைத்துள்ளார்.
இந்த மனுவை இன்று விசாரித்த உயர் நீதிமன்றம், இது தொடர்பாக நாகை, தஞ்சாவூர், திருவாரூர் மாவட்ட கலெக்டர்கள் ஜனவரி 7ஆம் தேதி பதில் அளிக்கும்படி நோட்டீஸ் அனுப்ப உத்தரவிட்டுள்ளது.
